Ҳунарпешаи шинохтаи синамо, телевизион ва театр Корӯш Зореӣ рӯзи якшанбе, 8 ноябри соли 2026, дар синни 54-солагӣ аз олам даргузашт. Ӯ бо иҷрои нақши «Лови», бародари бузурги ҳазрати Юсуф (а), дар сериали машҳури «Юсуфи паёмбар» миёни бинандагони кишварҳои гуногун, бахусус форсизабонон, шинохта шуд. Ҳамчунин ҳузури ӯ дар сериалҳои «Кимиё» ва «Аном» дар хотираи бинандагони шабакаи «Айфилм2» боқӣ мондааст.
Корӯш Зореӣ 23 сентябри соли 1972 дар шаҳри Миноб, воқеъ дар ҷануби Эрон, ба дунё омадааст. Ӯ фаъолияти ҳунарии худро аз синни 13-солагӣ дар саҳнаи театр оғоз карда, баъдан ба бозигарӣ ва коргардонӣ рӯ овард.
«Лови»; нақше, ки фаромӯш намешавад
Барои бисёре аз бинандагон номи Корӯш Зореӣ бо нақши «Лови» дар сериали таърихию мазҳабии «Юсуфи паёмбар», таҳиягарӣ Фараҷуллоҳ Салҳшӯр, пайванд дорад. Ӯ дар ин асар нақши бародари бузурги ҳазрати Юсуф (а)-ро иҷро кардааст.
Яке аз саҳнаҳои таъсирбахши ин сериал лаҳзаи иқрори бародарони Юсуф аст. Зореӣ дар ин саҳна бо бозии табиӣ ва баёни эҳсосоти дарунӣ, аз ҷумла пушаймонӣ ва изтироби Ловиро, ба хубӣ таҷассум кардааст. Ин нақш аз хотирмонтарин иҷроҳои ҳунарии ӯ ба шумор меравад.
Ҳузур дар «Кимиё», «Аном» ва дигар асарҳо
Корномаи ҳунарии Зореӣ танҳо бо «Юсуфи паёмбар» маҳдуд намешавад. Ӯ дар сериалҳои «Кимиё», «Аном» ва «Мухторнома», инчунин филми синамоии «Рӯзи растохез» нақш офаридааст. Гуногунии ин асарҳо аз тавоноии ӯ дар иҷрои нақшҳои мухталиф шаҳодат медиҳад.
Театр; бахши муҳими фаъолияти ҳунарманд
Қисмати зиёди фаъолияти касбии Корӯш Зореӣ ба театр бахшида шудааст. Ӯ дар баробари бозигарӣ ва коргардонӣ, солҳои зиёд роҳбарии Маркази ҳунарҳои намоишии Ҳавзаи ҳунарии Эронро бар уҳда дошт ва дар пуштибонӣ аз гурӯҳҳои театрӣ, баргузории чорабиниҳои ҳунарӣ ва ҷалби ҷавонон ба ин соҳа саҳм гузошт.
Даргузашти Корӯш Зореӣ барои дӯстдорони синамо, телевизион ва театр талафоти ҳунарӣ ба шумор меравад. Бо вуҷуди рафтани ӯ, нақшофариҳояш дар хотираи бинандагон боқӣ хоҳанд монд.
Шабакаи «Айфилм2» низ бо пахши асарҳое чун «Юсуфи паёмбар», «Кимиё» ва «Аном» ҳунари ин бозигарро ба бинандагони Тоҷикистон, Афғонистон ва дигар кишварҳои форсизабон муаррифӣ кардааст.
