Пас аз қиссаи пурфарозунишеби чанд насли як оила дар се давраи муҳими таърихи Эрон, имшаб — 29 сентябр— қисмати охирини серияли «Кимиё» аз шабакаи Айфилм2 намоиш дода мешавад. Дар қисмати ниҳоӣ сарнавишти Кимиё, Шаҳриёр, Озода ва дигар қаҳрамонони асосӣ ба марҳилаи ниҳоии худ мерасад.
«Кимиё» бо коргардонии Ҷавод Афшор ва сенарияи Масъуд Беҳбаҳониниё дар 110 қисм таҳия шудааст. Сериял зиндагии Кимиё Порсоро аз солҳои пеш аз Инқилоби исломии Эрон то давраи ҷанг ва замони муосир ба тасвир мекашад. Густариши рӯйдодҳо дар чанд давраи таърихӣ ба тамошобин имкон медиҳад, ки дар баробари саргузашти оилавии қаҳрамонҳо, тағйироти зиндагӣ ва муносибати онҳо ба рӯйдодҳои муҳими иҷтимоиву таърихиро низ мушоҳида кунад.
Дар қисматҳои охир асрори солҳои гузашта тадриҷан ошкор мешавад. Шаҳриёр пас аз огоҳ шудан аз ҳақиқати марбут ба Мушфиқ дар ҷустуҷӯи Кимиё ва кашфи ҳақиқати воқеаҳо мешавад. Ораш низ, ки аз гузаштаи худ ва рафтори падараш дурӣ ҷустааст, барои ошкор кардани ҳақиқат ва ислоҳи иштибоҳоти гузашта талош мекунад.
Дар қисмати ниҳоӣ рӯёрӯӣ бо одамони Мушфиқ ба марҳилаи ҳассос мерасад ва талош барои наҷоти Кимиё саргузашти қаҳрамонҳоро ба нуқтаи ниҳоии худ мерасонад.
Ҷавод Афшор, коргардони «Кимиё», қаблан дар бораи поёни сериял гуфта буд, ки бо вуҷуди талхиву буҳронҳои зиёде, сарнавишти қаҳрамонҳои асосӣ дар ниҳоят ба сӯи раҳоӣ ва ошкор шудани ҳақиқат ҳаракат мекунад. Яке аз ин қаҳрамонҳо Озода аст, ки пас аз солҳои зиёд бо ҳувият ва решаҳои аслии худ рӯ ба рӯ мешавад.
Меҳрова Шарифиниё, Ҳасан Пуршериозӣ, Озито Ҳоҷиён, Пуриё Пурсурх, Меҳдӣ Покдил, Меҳдӣ Султонӣ, Сайид Меҳрдод Зиёӣ, Амирҳусайн Ормон ва Сугул Таҳмосибӣ аз ҳунарпешагони ин сериял мебошанд.
Қисмати охирини «Кимиё» имшаб, соати 21:00 ба вақти Теҳрон, 22:00 ба вақти Кобул ва 22:30 ба вақти Душанбе, аз Айфилм2 намоиш дода мешавад.
Бо анҷоми «Кимиё», аз чоршанбе 30 сентябр, серияли таърихию ошиқонаи «Маҳёр Айёр» ҷойи онро мегирад. Ин сериял бо коргардонии Сайид Ҷамол Сайидҳотамӣ таҳия шуда, рӯйдодҳои он дар давраи Сафавиён ва дар шаҳрҳои Язд ва Исфаҳон ба вуқӯъ мепайванданд.
«Маҳёр Айёр» низ дар ҳамон соат аз Айфилм2 намоиш дода мешавад.
