Ба гузориши Айфилм2, бо наздик шудани қисматҳои охирини мавсими аввали серияли «Ситоиш», мавсими дуюми ин сериял аз панҷшанбеи 24-уми Сентябри соли 2026 меҳмони хонаҳои тамошобинони Айфилм2 мешавад. Дар ин мавсим, пас аз гузашти 22 сол, зиндагии Ситоиш ва фарзандонаш дар шароити нав пайгирӣ мешавад.
Мавсими дуюми «Ситоиш» бо коргардонии Саьид Султонӣ соли 1392 истеҳсол шудааст. Қиссаи ин мавсим чанд сол пас аз рӯйдодҳои мавсими аввал идома меёбад. Ситоиш бо ду фарзандаш бо номи нав ва насаби «Рӯдборӣ» зиндагӣ мекунад ва гумон дорад, ки аз гузашта, бахусус Ҳишмат Фирдавс, барои ҳамеша дур шудааст.
Ситоиш, ки акнун дар шаҳри Ромсар соҳиби як ошхона аст, барои худ ва фарзандонаш зиндагии ороме сохта, дар миёни мардум низ обрӯву эътибори хубе пайдо кардааст. Аммо гузаштаи пинҳонкардаи ӯ пас аз солҳои зиёд дубора ба зиндагияш бармегардад. Бозгашти Ҳишмат Фирдавс масири зиндагии Ситоишро тағйир дода, асрореро, ки ӯ барои ҳифзи оилааш пинҳон карда буд, бори дигар ошкор месозад.
Дар ин мавсим, ихтилофи миёни Ситоиш ва Ҳишмат Фирдавс танҳо ба як ихтилофи хонаводагӣ маҳдуд намешавад ва қарорҳою муносибатҳои қаҳрамонҳо қиссаро ба сӯи кашмакашҳои нав мебаранд. Ҳузури ҳунарпешаҳое чун Дориюш Арҷманд, Наргис Муҳаммадӣ, Меҳдӣ Сулукӣ, Симо Тирандоз, Ҳадис Мираминӣ, Амирмуҳаммад Занд, Ромсин Кибритӣ ва Фарибо Нодирӣ низ аз бахшҳои муҳими мавсими дуюми ин сериял ба шумор меравад.
Серияли «Ситоиш» қаблан низ дар миёни сериялҳои мавриди таваҷҷуҳи тамошобинони Айфилм қарор дошта, мавсимҳои гуногуни он аз ин шабака пахш шудаанд.
Бар асоси барномаи Айфилм2, мавсими дуюми серияли «Ситоиш» аз панҷшанбеи 24-уми Сентябри соли 2026, ҳар рӯз соати 19:00 ба вақти Теҳрон, 20:00 ба вақти Кобул ва 20:30 ба вақти Душанбе аз ин шабака пахш мешавад.
