Гоҳе як қаҳри куҳна солҳо фосила меофарад; аммо як иттифоқи хурд метавонад тамоми муодиларо барҳам занад. Филми телевизионии «Як моҳ ва даҳ рӯз» бо чунин гиреҳи эҳсосӣ ва хонаводагӣ, панҷшанбе, 19 феврали соли 2026, аз шабакаи iFilm2 пахш мешавад ва ривояте пуркашиш аз дилхӯрӣ, ишқи пинҳон ва рӯёрӯии эҳсос ва ғурурро пешкаши бинандагон мекунад.
Ин филм ба коргардонии Сайид Муҷтабо Ёсинӣ ва нависандагии Шиво Меҳрдод соли 1383 хуршедӣ таҳия шудааст ва дар фазои драмаи хонаводагӣ ҷараён мегирад; ҷое ки муносибатҳои инсонӣ, якравиҳои дерина ва тасмимҳои сарнавиштсоз, достонро қадам ба қадам ба нуқтаҳои ҳассос мерасонанд. Қисса дар бораи Масъуд ва Моҳрух, хоҳару бародаре аст, ки солҳост бар сари дилхӯриҳои хурд, аммо пойдор, равобити худро қатъ кардаанд. Шикаф миёни онҳо чунон амиқ шудааст, ки ҳатто дар як маҳфил ҳам канори ҳам намеистанд.
Аммо зиндагӣ роҳи дигареро боз мекунад. Гесу, духтари Масъуд, ва Беҳдод ,писари Моҳрух, ҳамсинфанд ва миёнашон пайванди эҳсосӣ шакл гирифтааст. Беҳдод Гесуро барои зиндагии муштарак интихоб кардааст, аммо ин тасмими содда, дар сояи душмании ду хонавода, ба масъалае печида табдил меёбад. Аъзои хонавода аз ин роз огоҳанд, вале ҳеҷ кас ҷуръат намекунад нахустин қадамро барои нарм шудани дилҳо бардорад. Ҳамин таълиқи пинҳон фазои филмро саршор аз интизорӣ, нигаронӣ ва умед месозад ва бинандаро бо ин пурсиш ҳамроҳ мекунад, ки оё ишқ метавонад девори солҳои қаҳрро фурӯ резад ё не.
Дар «Як моҳ ва даҳ рӯз» Беҳзод Фароҳонӣ, Пурандӯхт Муҳиман, Ваҳид Шайхзода, Фарида Дарёмаҷ, Нидо Қурбонӣ, Ҳамид Яздонии Абиёна, Муҳаммад Асадӣ, Судоба Гударзӣ, Амир Оташонӣ, Сабо Қосимӣ, Маҷид Ситоиш, Озода Ҳусайнӣ ва гурӯҳе дигар аз ҳунармандон нақш офаридаанд. Ҳамоҳангии ин чеҳраҳо бо достоне бар мабнои эҳсосоти хонаводагӣ фазое меофарад, ки барои мухотибони алоқаманд ба драмаҳои иҷтимоӣ ва эҳсосӣ, тамошобоб ва пайгиришаванда аст.
Қобили зикр аст, ки iFilm2 тибқи суннати ҳарҳафтаина, рӯзҳои панҷшанбе як филми телевизиониро барои мухотибон пахш мекунад ва дар ин рӯз сериалҳои «Хона ба дӯш» ва «Туфанги сарпур» рӯи антенна намераванд. Филми телевизионии «Як моҳ ва даҳ рӯз» рӯзи панҷшанбе, 19 феврали соли 2026, соати 20:00 ба вақти Теҳрон, 21:00 ба вақти Кобул ва 21:30 ба вақти Душанбе аз шабакаи iFilm2 пахш хоҳад шуд.
