Ба гузориши iFilm2, филми синамоии «Тароҷ» яке аз осори барҷастаи синамои ҷиноятӣ-пулисии Эрон ба шумор меравад, ки бо ривояти пуртаниш аз қочоқи маводи мухаддир, эътиёд ва муқобилияти қонун бо шабакаҳои ҷиноятии созмонёфта, рӯзи панҷшанбе, 12-уми феврали соли 2026, аз шабакаи iFilm2 намоиш дода мешавад. Ин филм ба коргардонии Эраҷ Қодирӣ аз ҷумлаи осорест, ки дар солҳои худ тавонист бо достоне ҳодисамеҳвар ва ҳамзамон иҷтимоӣ, тамошобинони зиёдеро ба худ ҷалб намояд.
Қиссаи филм атрофи қаҳрамоне бо номи Зейнол Бандарӣ мегардад; қочоқчии собиқадоре, ки дар ҷараёни амалиёти мубориза бо маводи мухаддир аз ҷониби Аҳмад, масъули бахши мубориза бо маводи мухаддир, боздошт мегардад. Зейнал бо истифода аз ришва ҳукми маҳкумияти худро коҳиш медиҳад ва баъд аз муддате аз зиндон озод мешавад, аммо зиндагии ӯ боз ҳам дар гирдоби ҳамон шабакаҳои ҷиноятӣ гирифтор мегардад. Дар идома, ӯ дар мавқеияти дугона қарор мегирад: аз як сӯ бо унсурҳои қочоқ дар иртибот аст ва аз сӯи дигар ба ҳамкорӣ бо пулис барои шиносоӣ ва зарба задан ба шабакаи паҳнкунии маводи мухаддир кашонда мешавад. Ин ҳамкорӣ ба ташаккули муносибати мураккаб ва бар пояи эътимод миёни ӯ ва лейтенант Аҳмад меанҷомад.
Ривояти филм замоне ҷанбаи эҳсосӣ ва талхтар мегирад, ки маълум мешавад писари Зейнол низ гирифтори вобастагӣ ба маводи мухаддир шудааст. Ин масъала бӯҳрони шахсии қаҳрамони достонро дар канори рисолати пулисӣ барҷаста месозад ва нишон медиҳад, ки осеби маводи мухаддир на танҳо ҷомеа, балки хонаводаи худи қочоқчиёнро низ фаро мегирад. Ҳамин қабати иҷтимоӣ филми «Тароҷ»-ро аз як асари сирфан экшн ҷудо намуда, ба як кори ҳушдордиҳанда дар бораи паёмадҳои эътиёд табдил медиҳад; мавзӯе, ки барои тамошобинони Афғонистон ва Тоҷикистон низ комилан ошно ва қобили дарк мебошад.
Дар ин филм Ҷамшед Ҳошимпур (Ҷамшед Ориё) нақши Зейнол Бандариро иҷро мекунад ва Беҳзод Ҷавонбахш, Фахрӣ Хуруш, Расул Таваккалӣ, Ҳусайн Маликӣ ва Ҳасан Зандӣ аз дигар бозигарони он мебошанд. Ҳузури Ҷамшед Ҳошимпур, ки дар он давра яке аз чеҳраҳои машҳури филмҳои ҳодисавӣ буд, аз омилҳои асосии ҷозибаи ин асар маҳсуб меёбад.
Филми синамоии «Тароҷ» рӯзи панҷшанбе,12-уми феврали соли 2026, соати 20:00 ба вақти Теҳрон, 21:00 ба вақти Кобул ва 21:30 ба вақти Душанбе аз шабакаи iFilm2 пахш хоҳад шуд.
