Фасли сеюми сериали маъруфи эронии «Ситоиш» аз рӯзи сешанбе, 20 октябри соли 2026, ба пахши шабакаи Айфилм2 оғоз мекунад. Ин сериал қиссаи зиндагии Ситоиш ва Ҳишмати Фирдавсро идома дода, тамошобинонро бо рӯйдодҳои тоза, печидагиҳои оилавӣ ва сарнавишти қаҳрамонҳои худ ошно месозад.
Дар фасли нав Ҳишмати Фирдавс, ки нақши ӯро ҳунарманди шинохта Дориюш Арҷманд иҷро мекунад, талош дорад обрӯ ва дороии аздастрафтаашро барқарор намояд. Ӯ ба воситаи наберааш Муҳаммад дубора ба Ситоиш наздик шуда, дар хонаи ӯ зиндагӣ мекунад. Аммо мушкилоти гузашта ҳанӯз ҳал нашудаанд ва дасисаҳои нав зиндагии ин хонаводаро ба самти дигар мебаранд.
Дар идомаи қисса, Собир, ки аз муносибати пешинааш бо падар пушаймон аст, қурбонии нақшаҳои маккоронаи Парисимо мешавад. Парисимо бо фиребу найранг дороиҳои Ҳишмати Фирдавсро ба даст меорад. Ҳамзамон, Анис қобилияти сухан гуфтанро дубора пайдо мекунад ва ба рақиби ҷиддии Парисимо табдил меёбад. Зиндагии шахсии Ситоиш низ ба марҳалаи нав ворид мешавад.
Сериали «Ситоиш 3» бо нависандагии Саъид Матлабӣ, коргардонии Саъид Султонӣ ва таҳиягарии Ормон Заринкӯб ба навор гирифта шудааст. Дориюш Арҷманд, Наргис Муҳаммадӣ, Маҳдӣ Сулукӣ, Симо Тирандоз, Фарибо Нодирӣ ва Фарҳод Ҷам аз ҳунармандони асосии ин сериал мебошанд.
Тамошобинони Айфилм2 метавонанд аз рӯзи сешанбе, 20 октябр, ҳар рӯз бо тамошои фасли сеюми сериали «Ситоиш» идомаи саргузашти Ситоиш ва Ҳишмати Фирдавс, инчунин паёмадҳои қарорҳо ва дасисаҳои навро дар зиндагии онҳо пайгирӣ кунанд.
