Пас аз чанд ҳафта таваққуф дар пахши филмҳои синамоӣ дар шабҳои панҷшанбеи ifilm2, ин бахши барномаҳои шабака бо филми «Шоҳиди айнӣ» аз сар гирифта мешавад. Ин асар саргузашти кӯдак ва сиррееро ба тасвир мекашад, ки ҳеҷ кас ба суханони ӯ бовар намекунад.
Филми синамоии «Шоҳиди айнӣ» бо коргардонии Ҷаҳонбахш Лак ва истеҳсоли соли 1380-и шамсӣ(2001 мелодӣ) мебошад. Филм бо меҳвар қарор додани нигоҳи як кӯдак ба як воқеаи пинҳонӣ, достоне муаммоӣ ва таърихиро пайгирӣ мекунад.
Дар ин филм «Амиралӣ» кӯдаке бо шӯхиву саргармиҳои хоси кӯдакона аст, ки ба далели нақл кардани саргузаштҳои хаёлӣ дар байни дӯстон ва аъзои оилааш ҳамчун дурӯғгӯ маъруф шудааст. Пас аз муноқиша бо яке аз дӯстонаш, падараш ӯро барои ҷазо ба болои боми хона мефиристад. Аммо Амиралӣ дар он ҷо шоҳиди як воқеаи даҳшатнок дар хонаи ҳамсоя мешавад. Ӯ мебинад, ки як олими динӣ ба далели мухолифат бо сиёсати ҳукумат ба қатл мерасад. Аммо вақте ки Амиралӣ ин воқеаро ба падараш нақл мекунад, касе омода нест ба суханони ӯ бовар кунад.
Бо пешрафти достон ин савол ба миён меояд, ки оё Амиралӣ воқеан ҳақиқатро дидааст ё ба хаёлбофӣ ва дурӯғгӯӣ машғул аст. Ҳамин шакку тардид сирри асосии филмро ташкил медиҳад ва тамошобинро то поёни он бо худ ҳамроҳ мекунад.
Сурайё Қосимӣ, Алӣ Усиванд, Соноз Самовотӣ, Зебо Буруфа, Сиёмак Ашъариюн, Меҳрдод Зиёӣ ва Ризо Эронманш аз бозигарони ин филм мебошанд.
Бар ин асос, филми «Шоҳиди айнӣ» рӯзи панҷшанбе, 20-уми август соати 20:00 ба вақти Теҳрон, 21:00 ба вақти Кобул ва 21:30 ба вақти Душанбеи Тоҷикистон аз шабакаи ifilm2 пахш мешавад.
