Ба гузориши iFilm 2, нишасти машваратӣ оид ба баррасии роҳҳои гирдоварӣ, тасҳеҳ ва интишори нусхаҳои хаттии Мир Сайид Алии Ҳамадонӣ бо ҳузури устодон ва пажӯҳишгарони кишварҳои узви Созмони ЭКО дар Теҳрон баргузор шуд.
Ин нишаст рӯзи 14-юми июли соли 2026 дар Муассисаи фарҳангии ЭКО баргузор гардид ва ширкаткунандагон дар он масъалаҳои шиносоӣ, нусхашиносӣ, тасҳеҳ ва интишори осори хаттии Мир Сайид Алии Ҳамадониро мавриди баррасӣ қарор доданд.
Мир Сайид Алии Ҳамадонӣ, ориф ва донишманди форсизабони қарни ҳаштуми ҳиҷрӣ, аз чеҳраҳои таъсиргузор дар густариши дини ислом ва андешаҳои ирфонӣ дар Кашмир ва Осиёи Марказӣ ба шумор меравад. Ӯ дар шаҳри Ҳамадони Эрон ба дунё омада, миёни мардуми Кашмир бо лақаби «Алии Сонӣ», дар миёни муридонаш бо унвони «Шоҳи Ҳамадон» ва дар Тоҷикистон бо номи «Ҳазрати Амирҷон» шинохта мешавад. Оромгоҳи ӯ дар шаҳри Кӯлоб ҷойгир аст.
Ҷойгоҳи Мир Сайид Алии Ҳамадонӣ дар таърихи фарҳангии Эрон ва нуфузи густардаи андешаҳои ӯ дар Тоҷикистон ва дигар минтақаҳои Осиёи Марказӣ, ӯро ба яке аз чеҳраҳои муҳими пайванддиҳандаи мероси муштараки фарҳангии минтақа табдил додааст. Аз ҳамин рӯ, шиносоӣ ва эҳёи осори хаттии мансуб ба ӯ барои пажӯҳишгарон ва марказҳои илмии минтақа аҳаммияти вижа дорад.
Муҳаммад Ҳасан, раиси Муассисаи фарҳангии ЭКО, дар ин нишаст бо ишора ба ҷойгоҳи Мир Сайид Алии Ҳамадонӣ дар мероси муштараки фарҳангии минтақа, эҳёи осор ва андешаҳои ӯро заминае барои таҳкими ҳамгироии фарҳангӣ миёни миллатҳои минтақа арзёбӣ кард.
Низомиддин Зоҳидӣ, сафири Ҷумҳурии Тоҷикистон дар Теҳрон, низ бар зарурати муаррифии густардатари мероси илмӣ ва маънавии Мир Сайид Алии Ҳамадонӣ ва нақши ӯ дар пайванди тамаддунҳои минтақа таъкид намуд.
Акбар Эронӣ, мудири Муассисаи пажӯҳишии «Мероси мактуб», аз шиносоии 105 асари мансуб ба Мир Сайид Алии Ҳамадонӣ дар Эрон, Туркия ва нимқораи Ҳинд хабар дода, ҳамкории марказҳои илмии кишварҳои минтақаро барои гирдоварӣ ва тасҳеҳи ин осор зарурӣ донист.
Муҳаммад Сурӣ, Сайидризо Боқириён Муваҳҳид, Ориф Навшоҳӣ ва Абдулвалӣ Шарифзода низ дар суханрониҳои худ бар аҳаммияти нусхашиносӣ, тасҳеҳи осор ва муаррифии мероси фикрӣ ва фарҳангии Мир Сайид Алии Ҳамадонӣ таъкид карданд.
Ин нишаст бо дабирии Шоҳмансур Шоҳмирзо, коршиноси ЭКО аз Тоҷикистон, баргузор гардид ва ширкаткунандагон бар идомаи ҳамкориҳои минтақавӣ барои гирдоварӣ, тасҳеҳ ва интишори осори Мир Сайид Алии Ҳамадонӣ таъкид намуданд.
همدانی بزرگ را بهتر است کاری کنید که بیشتر شناخته شود.