Бо наздик шудани қисматҳои поёнии силсилафилми «Полиси ҷавон», шабакаи iFilm2 аз рӯзи ҷумъа, 10 июли соли 2026, пахши силсилафилми ҷиноятӣ ва муаммоии «Бозпурс»-ро оғоз мекунад. Ин силсилафилм як парвандаи қатлро ба шабакаи печидаи қонуншиканиҳои иқтисодӣ ва асрори ниҳонӣ мепайвандад.
«Бозпурс» бо коргардонии Аҳмад Муаззамӣ, таҳиягарии Муҳаммадризо Шафиъӣ ва нависандагии Ҳусайн Туробнажод таҳия шудааст. Ин силсилафилм дар фазои додгоҳӣ ва муаммоӣ бинандаро бо як парвандаи печида ҳамроҳ месозад; парвандае, ки дар зоҳир бо як ҷиноят оғоз мешавад, аммо тадриҷан паҳлуҳои густурдатар пайдо мекунад.
Ҳикоя аз замоне оғоз меёбад, ки Садро Ҳусайнӣ, қозии тафтишоти адлия аз шаҳри Бандар Аббос, барои расидагӣ ба як парвандаи нав ба Теҳрон фиристода мешавад. Нахустин вазифаи ӯ таҳқиқи як парвандаи қатл аст. Аммо дар ҷараёни тафтишот нишонаҳое пайдо мешаванд, ки нишон медиҳанд ин ҳодиса шояд танҳо як ҷинояти оддӣ набошад.
Бо пешрафти таҳқиқот, самти парванда ба масъалаи бузургтар — фасоди иқтисодӣ дар яке аз бонкҳо — мерасад. Ин парвандаи ҳассос бо баъзе афроди наздик ба зиндагии шахсии Садро низ иртибот дорад ва вазъиятро боз ҳам мураккабтар мекунад. Ӯ маҷбур аст миёни вазифаи қонунӣ, ошкор кардани ҳақиқат ва муносибатҳои хонаводагӣ қарорҳои душвор қабул намояд.
Яке аз вижагиҳои асосии «Бозпурс» омезиши фазои полисӣ ва додгоҳӣ бо масъалаҳои иҷтимоӣ мебошад; ҷое ки як ҳодисаи хурд метавонад нишонаи мушкили бузургтар бошад ва расидан ба ҳақиқат таҳқиқи амиқ, сабру таҳаммул ва пайгирии пайвастаро талаб мекунад.
Дар ин силсилафилм Муҳсин Қассобиён, Фарҳод Қоимён, Муҳаммадризо Шарифиниё, Маҳдӣ Фахимзода, Фарибо Кавсарӣ, Андеша Фулодванд, Сайидҷавод Ҳошимӣ, Сугул Таҳмосбӣ, Ситора Содот Қутбӣ ва Пурандухт Маҳиман нақш офаридаанд.
«Бозпурс» достони ҷустуҷӯи ҳақиқат дар миёни парвандаҳое мебошад, ки ҳар сарнишона саволи наверо ба миён меорад.
Дар поён хотиррасон мекунем, ки силсилафилми «Бозпурс» аз 10 июли соли 2026 ҳар рӯз соати 17:00 ба вақти Теҳрон, 18:00 ба вақти Кобул ва 18:30 ба вақти Душанбе аз шабакаи iFilm2 пахш мешавад.
