Ба гузориши iFilm 2, филми синамоии «Эй Эрон» ба коргардонии Носир Тақвоӣ, аз осори мондагори синамои иҷтимоии Эрон, қарор аст рӯзи панҷшанбе 5 феврали соли 2026 аз шабакаи ҷаҳонии iFilm 2 барои бинандагони форсизабон пахш шавад. Ин филм, ки дар соли 1989 мелодӣ сохта шудааст, бо нигоҳе ҳаҷвомез, аммо интиқодӣ, ба баррасии муносибати қудрат ва нақши мардум дар лаҳзаҳои сарнавиштсози таърих мепардозад.
Носир Тақвоӣ дар «Эй Эрон», бар хилофи бисёре аз осори классикӣ, қаҳрамони воҳидеро дар маркази ривоят қарор намедиҳад, балки мардуми як шаҳрро нишон медиҳад, ки дар баробари иқтидори таҳмилшуда меистанд. Достони филм дар рӯзҳои пурташаннуҷи мунтаҳӣ ба пирӯзии Инқилоби 1979 мегузарад ва дар шаҳри Мосула дар шимоли Эрон ривоят мешавад; фазое, ки бо зиндагии ҷамъӣ ва суннатии сокинонаш ба хубӣ бо муҳтавои филм ҳамоҳанг аст.
Дар хулосаи достон омадааст, ки дар авҷи инқилоби мардумии Эрон, гурӯҳбон Макундӣ ба Мосула фиристода мешавад ва бо рафтори хушунатомез ва таҳқиромез оромиши мардумро барҳам мезанад. Ӯ барои нишон додани иқтидори худ, манъи рафтуомад эълон мекунад, аммо касабаи бозор, омӯзгорон, шогирдони мактаб ва дигар сокинони шаҳр тадриҷан дар баробари ӯ муқовимат мекунанд. Ҳамзамон бо фирори шоҳи Паҳлавӣ аз Эрон, мардуми Мосула ба қароргоҳи зери фармондеҳии ӯ, ки ба баҳонаи боло бурдани рутбааш дар он ҷашн барпо шудааст, ҳамла бурда, рамзҳои қудрати ӯро дарҳам мешикананд.
Филми «Эй Эрон» ба нависандагӣ ва коргардонии Носир Тақвоӣ сохта шуда, Акбар Абдӣ ва Ҳусайн Саршор дар нақшҳои асосии он бозӣ кардаанд. Аз дигар бозигарони ин филм метавон ба Сурайё Ҳикмат, Ғуломҳусайн Нақшина, Ҳамид Ҷабалӣ, Ҳасан Афросиёбӣ, Асғари Бечора ва гурӯҳе аз ҳунармандони шинохташудаи синамо ва театри Эрон ишора кард. Бозӣҳо дар канори фазои бумӣ ва ривояти ҷамъмеҳвар, ба филм ҳолу ҳавое наздик ба зиндагии воқеии мардум бахшидааст.
Бар ин асос, филми синамоии «Эй Эрон» рӯзи панҷшанбе 5 феврали соли 2026, соати 20:00 ба вақти Теҳрон, 21:00 ба вақти Кобул ва 21:30 ба вақти Душанбе, Тоҷикистон, аз шабакаи iFilm 2 ба пахш мерасад. Ин филм бо ривояти ҳаҷвомези худ аз муқовимати мардумӣ дар баробари истебдоди худкомаи шоҳаншоҳӣ, фурсате барои бозхондани як таҷрибаи таърихии муштарак дар забони синамо фароҳам меорад; таҷрибае, ки фаротар аз марзҳои ҷуғрофиёӣ, барои бисёре аз бинандагони форсизабон ошно ва андешабарангез аст.
